And the plot thickens ...

Ástin spyr hvorki um stétt né stöðu. Ástin fæst hvorki keypt né seld. Samt sem áður er það svo að spurningar um stétt og stöðu fylgja yfirleitt í kjölfarið á almennri kynningu þegar fólk tekur tal saman með tilvonandi (áhersla á "vonandi") gagnkvæman áhuga í huga (uga, ga, a, ahhhhhh). Ég geri þetta sjálf undir þessum kringumstæðum:

Áhugasamur: "Sæl, ég heiti XXX, má ég tylla mér hjá þér?"

Ég: "Sæll, ég heiti Gústa, gjörðu svo vel!" (Hugsa mér gott til glóðarinnar því hann virðist sæmilega máli farinn, er ekki lágvaxinn og ekkert ómyndarlegur).

Áhugasamur: "Ég verð að viðurkenna að ég vind mér nú ekki oft að ókunnugum konum á þennan hátt en þú heillaðir mig alveg uppúr skónum um leið og ég sá þig."

Ég: "Elskan, vertu ekkert að afsaka þig, þetta gerist oft, (í huganum: "YEEEEESSS") segðu mér aðeins frá þér, hvað gerir þú?"

Áhugasamur: "Tjah, ég er nú svolítið á milli vita núna, hef verið að vinna í Hampiðjunni í nokkur ár en var sagt upp vegna samdráttar fyrir mánuði síðan og er núna að leita mér að vinnu."

Ég: "Og hvernig gengur það?" (Seilist um leið ofaní töskuna mína og tek um farsímann) "Er eitthvað að hafa?"

Áhugasamur: "Já og nei, hef verið að grípa í járnabindingar, alltaf nóg að hafa þar svosem, mig langar bara að fá þægilegri vinnu en það er ekki um auðugan garð að gresja þegar maður er kominn á fertugsaldurinn og bara hálfnaður með stúdentsprófið. Verð samt að fara að setja hörku í málið, er að borga tvö og hálft meðlag og leigan borgar sig ekki sjálf."

Ég: "Já þú meinar, (tek farsímann uppúr töskunni) nei heyrðu, ég var að fá SMS frá systur minni, verð að rjúka, hún klemmdi sig á bílhurð og ég þarf að bora í nöglina á henni með mjög fínum bor til að hleypa þrýstingnum út. Gaman að kynnast þér, (hleyp að dyrunum) vertu blessaður!"

Ég spyr Sveinsínur: Er þetta eðlilegt?