Lasagna og rauðvín

Var að velta því fyrir mér í morgun þegar ég tók niður gardínurnar heima hjá mér svo smiðirnir gætu skipt um glugga hvað ég hef það gott. Ég er soldið í því á þessum síðustu og verstu að spöglera í því. Það er mjög mikilvægt að muna hvað maður getur þakkað fyrir og glaðst yfir þegar umræðan í samfélaginu er oftast með neikvæðum formerkjum. Ég reyni að vera frekar lausnamiðuð en einblína á vandamálin - svona í orði í það minnsta.
Þess vegna verð ég með stærstu og flottustu eyrnalokkana í sumarbústaðnum um helgina! Þegar ég var að skoða eyrnalokkasafnið mitt í gær (sem er þó nokkuð) sá ég að ég á enga lokka sem mér þótti nógu stórir. Hvað gera bændur þá? Tvennt í stöðunni:

• a) fara í búð og kaupa stóra eyrnalokka eða
• b) föndra þá sjálf úr því sem til er í handraðanum heima.

Hvorn kostin valdi ég? Jú, b) að sjálfsögðu svo ég sat í gærkvöldi við það að gera stóra eyrnalokka. Þeir eru mjög bjútífúl og til þess fallnir að minna okkur allar á baráttuna við brjóstakrabbamein. Ég hlakka rosalega til þess að sýna ykkur afraksturinn í kvöld. Ji, ég hlakka bara svo til að hitta ykkur í kvöld!